ನನ್ನ ಕವಿತೆ

ಕ್ಷಮಿಸಿ,ನನ್ನ ಕವಿತೆ
ನಿಮ್ಮ ಕವಿತೆಯಂತಲ್ಲ

ಉಳ್ಳವರ ತುಳಿತಕ್ಕೆ

ಮೈ-ಮನಸು ಹ(ಹು)ಣ್ಣಾಗಿ
ನೆಲಕಿಳಿದ ಕಣ್ಣೀರು ನನ್ನ ಕವಿತೆ

ಹೊರೆ-ಬದುಕು ಭಾರಕ್ಕೆ
ಬರಿ ಹೊಟ್ಟೆ ಬೆನ್ನಾಗಿ
ಬಸವಳಿದ ಬಿಸಿಯುಸಿರು ನನ್ನ ಕವಿತೆ

ಹಿಡಿ ಅನ್ನ ಸಂಬಳಕೆ
ದುಡಿ-ದುಡಿದು ಕರಕಾದ
ಕಾರ್ಖಾನೆಯ ಕಪ್ಪುಹೊಗೆ ನನ್ನ ಕವಿತೆ

ಧನಿಕರ ಮೈತೃಷೆಗೆ
ಹಸಿಮಾಂಸ ಹೊ(ನ)ರಳಾಡಿ
ತಿಪ್ಪೆ ಸೇರಿದ ಭ್ರೂಣ ನನ್ನ ಕವಿತೆ

ಸಮಬಾಳು ಸಮಪಾಲು
ಹಕ್ಕುಗಳಿಗೆ ದನಿಯೆತ್ತಿ
ಕೋವಿ ನುಂಗಿದ ರಕ್ತ ನನ್ನ ಕವಿತೆ
- ಗುರುನಾಥ ಬೋರಗಿ